AVONTUURKLUB

IMG_0253

Geskiedenis
Affies se avontuurklub bestaan sedert 2005 in sy huidige vorm.

Geleentheid tot deelname
Die klub verwelkom seuns uit alle grade wat ‘n liefde vir die natuur en avontuur het.

Toere
In 2005 het die klub in Namibië die Oranjerivier met kano’s aangedurf. In 2006 is die groep Zimbabwe toe waar hulle in die omgewing van die Victoriawaterval op die Zambezi geroei het, die Zambezi Nasionale Park verken het en tiervis gevang het. Hulle het ook twee keer die 111 m-reksprong oor die Zambesi gedoen. In 2007 het hulle die Blyde-roete gestap. In 2008 het die klub hulle deel vir natuurbewaring gedoen deur te help om ‘n stuk grond vir die De Wildt Jagluiperdstigting te rehabiliteer deur indringerplante te verwyder en inheemse bome aan te plant. In 2009 is die manne deur die Koue Bokkeveld Weskus toe waar hulle vir vier dae lank die Langebaanstrandmeer en die Weskus Nasionale Park verken het. In 2010 roei die Affies op die Oranjerivier deur die Richtersveld. In 2011 is die bekende Strandloper roete aangedurf. Daar is vir vyf dae lank die volle 60 km voetgeslaan, en snags is daar onder sterre op die strand geslaap. In 2012 stap die klub weer die Blyde-roete. Op soek na groter uitdagings durf die avontuurklub in 2013 die Fanie Botha-staproete in die Laeveld aan. In Oktober 2014 het die avontuurklub die Stamvrug-staproete in die verre Limpopo aangedurf. Die roete het twee dae se harde stap en bergklim behels, maar vir die avontuurklub is dit juis hierdie soort uitdaging wat jou laat voel dat jy leef!

In 2015 was dit tyd om die pragtige Magoebaskloof staproete aan te durf. Dit was voorwaar ‘n hoogtepunt aangesien die roetes deur die mooiste inheemse woude meander. Die oornaghutte was ook baie goed toegerus en kon ‘n mens lekker uitrus na ‘n harde dag se stap. Kaapschehoop staproete  is in 2016 deur die Affie-manne aangevat. Dit was ‘n staproete wat altyd onthou sal word aan die mooi uitsigte oor die laeveld vanaf die platorand. Ons het ook in grotte wat aan min mense bekend is gaan verken wat baie interessant was. In 2017 was die Ama Poot Poot staproete naby Dullstroom op die agenda van die avontuurklub. Die Affiemanne het  die koue van die berge tussen foreldamme verskriklik geniet. Daar is geswem in yskoue bergstrome om af te koel en sommige seuns het van ‘n 9 meter rotsklip in ‘n diep rotspoel gespring. In 2018 het daar weer 2 bussies vol seuns die pad gevat Laeveld toe en is die Wathaba staproete naby Machadodorp aangedurf. Sowat 26 seuns van graad 8 af tot matriek was deel van die ekskursie. Hulle het die pragtige natuurskoon baie geniet. Saans het hulle om ‘n kampvuur stories vertel, geskerts en heerlik vleis gebraai. In die oggende vroeg was almal op die been en is daar gesoek na avontuur op die staproete. Laat die middag was almal terug in die hut – moeg maar gelukkig en tevrede!

IMG_0235

Navrae
Tekkies Barkhuizen: tekkies.barkhuizen@affies.co.za of 012 344 3805 (skoolure)

Fotos

PERSONEEL

Mnr. H.M. Barkhuizen

Onderwyser
Vakke: Engels
Sport: Rugby, Krieket & Avontuurklub

Mnr W. van Staden

Onderwyser
Vakke: Ekonomiese en bestuurswetenskappe, Ekonomie & Rekeningkunde
Sport: Krieket, Hokkie & Avontuurklub
TERUG NA BO